چې د خیالونو په ورشو کې سره ګلونه لري
څوک خو به وي چې هم زما غوندې سوچونه لري
یاغي سالاره د جنون قافلې مه لوټه وه
دلته بلا زړونه د مینې ارمانونه لري
د خپله ځانه بې خبر جانان ته څنګ ووایم
چې ورک احساس مې ستا د زړه سره تارونه لري
هسې ارمان مو د تاوان په تله وه تاللو
هسې یو خوب چې د ژوندو سترګو یادونه لري
زما د مینې داستان دې تیارو کې نه پټیږي
ماته معلوم دي چې وختونه چراغونه لري
واېې دا خلک د قسمت کرښې لاسونو کې وي
لاس چې څوک نه لري هغه هم قسمتونه لري
یا دا قصه به څه د وصل تر حد ورسیږي
نن سبا خلک د سپرلو غوندې خویونه لري
ما چې زما په کور کې وژني زما حق لوټه وي
زه څنګه وه وایم چې هغه خلک زړونه لري
څه به زمونږ د کمزورتیاو؛ نښې هم په کې وي
او څه نصیب زمونږ په چارو کې لاسونه لري
ځم چې د خپلې پاکۍ څه ثبوت خو ورکړم ورله
یو څوک زمونږ د ذات په هکله څه شکونه لري
د ډیره خوفه زه په خپل وجود کې پټه شمه
دا بازې خلک ډیر بدرنګ بدرنګ مخونه لري
